Mae polisïau’r practis yn cynnwys y canlynol:
Polisi Mynediad at Gofnodion Meddygol, Polisi Recordio Galwadau, Polisi Cyfathrebu, Polisi Cyfrinachedd a Diogelu Data, Polisi Cwcis, Gweithdrefnau Diogelu Data a Caldicott, Polisi Mynediad Cleifion Byddar, Polisi Delio â Chleifion Treisgar ac Ymosodol, Polisi Rhyddid Gwybodaeth, Gweithdrefnau’r GDPR, Polisi Llywodraethu Gwybodaeth, Polisi Diogelwch Gwybodaeth a TG, Polisi Defnydd Derbyniol o'r Rhyngrwyd a'r Cyfryngau Cymdeithasol, Polisi Gwasanaethau e-bost ISMS, Polisi Gweithio Symudol, Polisi Rheoli Pandemig, Polisi Dyfeisiau Cludadwy, Polisi Rheoli Cofnodion, Gweithdrefnau Cais am Fynediad gan y Testun, Polisi Galwadau Ffôn, Polisi Preifatrwydd y Wefan, Polisi Dim Goddefgarwch.
Mae copïau o’n polisïau a’n gweithdrefnau ar gael ar gais trwy gysylltu â rheolwr y practis: enquiries.fishguard@wales.nhs.uk
Mae dyfyniadau o rai o'r rhain i'w gweld isod:
Cyfrinachedd
Gallwn eich sicrhau y bydd unrhyw beth y byddwch yn ei drafod ag unrhyw aelod o staff y feddygfa, boed yn feddyg, yn nyrs neu'n dderbynnydd, yn aros yn gyfrinachol. Yr unig reswm pam y gallai fod arnom eisiau ystyried trosglwyddo gwybodaeth gyfrinachol heb eich caniatâd fyddai er mwyn eich diogelu chi neu rywun arall rhag niwed difrifol. Mewn sefyllfa o'r fath, byddem bob amser yn ceisio trafod hyn â chi gyntaf.
Os oes gennych unrhyw bryderon neu ymholiadau ynghylch cyfrinachedd, mae croeso i chi ofyn i aelod o staff.
Os hoffech drafod materion o natur gyfrinachol, naill ai â'n derbynyddion neu ag aelod o dîm y practis, gallwn fel arfer ddod o hyd i ystafell i’r diben hwn.
Diogelu Data – GDPR
Er mwyn darparu'r lefel gywir o ofal, mae'n ofynnol i ni gadw gwybodaeth bersonol amdanoch ar ein systemau cyfrifiadurol ac ar ffurf cofnodion papur i'n helpu i ofalu am eich anghenion iechyd, a'ch meddyg sy'n gyfrifol am eu cywirdeb a'u cadw'n ddiogel. Helpwch i gadw eich cofnod yn gyfredol trwy roi gwybod i ni am unrhyw newidiadau i'ch amgylchiadau.
Cyfrinachedd a Gwybodaeth Bersonol
Mae gan feddygon a staff y practis fynediad at eich cofnodion meddygol i'w galluogi i gyflawni eu gwaith. O bryd i'w gilydd gall gwybodaeth gael ei rhannu ag eraill sy'n ymwneud â'ch gofal os bydd angen. Mae unrhyw un sydd â mynediad at eich cofnod wedi'i hyfforddi'n briodol mewn materion cyfrinachedd ac yn cael ei lywodraethu gan ddyletswydd gyfreithiol a chontractiol i gadw eich manylion yn breifat.
Cedwir yr holl wybodaeth amdanoch yn ddiogel, ac mae mesurau diogelu priodol ar waith i atal colledion damweiniol.
Mewn rhai amgylchiadau gall fod yn ofynnol yn ôl y gyfraith i ni ryddhau eich manylion i gyrff statudol neu gyrff swyddogol eraill, er enghraifft os cyflwynir gorchymyn llys, neu yn achos materion iechyd y cyhoedd. Mewn amgylchiadau eraill gall fod yn ofynnol i chi roi caniatâd ysgrifenedig cyn rhyddhau gwybodaeth – megis yn achos adroddiadau meddygol ar gyfer yswiriant, cyfreithwyr, ac ati.
Er mwyn sicrhau eich preifatrwydd, ni fyddwn yn datgelu gwybodaeth dros y ffôn na'r ffacs oni bai ein bod yn siŵr ein bod yn siarad â chi. Ni fydd gwybodaeth yn cael ei datgelu i deulu, ffrindiau neu bartneriaid priod oni bai bod gennym ganiatâd ysgrifenedig ymlaen llaw, ac ni fyddwn yn gadael negeseuon gyda phobl eraill.
Mae gennych hawl i weld eich cofnodion os dymunwch. Gofynnwch wrth y dderbynfa os hoffech gael rhagor o fanylion am hyn. Efallai y bydd angen trefnu apwyntiad. Mewn rhai amgylchiadau efallai y bydd ffi yn daladwy.
Polisi Hebryngwyr
Byddwn bob amser yn parchu eich preifatrwydd, eich urddas a’ch credoau crefyddol a diwylliannol, yn enwedig pan fo'n ddoeth cynnal archwiliadau personol – a dim ond gyda’ch caniatâd penodol y bydd y rhain yn cael eu cynnal, a byddwch yn cael cynnig dod â hebryngwr i'r archwiliad yn gwmni i chi os dymunwch.
Gallwch hefyd ofyn am hebryngwr pan fyddwch yn trefnu'r apwyntiad neu ar ôl cyrraedd y feddygfa (rhowch wybod i'r derbynnydd) neu ar unrhyw adeg yn ystod yr ymgynghoriad.
Polisi Delio â Thrais
Bydd staff y Practis bob amser yn amlygu parch a chwrteisi priodol wrth ymdrin â chleifion a'u cynrychiolwyr. Gofynnwn yn barchus i gleifion a'u cynrychiolwyr ymddwyn yn yr un modd wrth ymdrin ag aelodau o dîm y practis.
Mae gan y GIG bolisi Dim Goddefgarwch mewn perthynas â thrais a chamdriniaeth, ac mae gan y practis yr hawl i dynnu cleifion treisgar oddi ar y rhestr ar unwaith er mwyn diogelu staff y practis, cleifion a phobl eraill.
Ni fydd unrhyw fath o ymddygiad ymosodol (boed yn eiriol neu'n gorfforol ei natur) yn cael ei oddef. Gall unrhyw achosion o ymddygiad o'r fath ar safle'r practis arwain at roi gwybod i'r heddlu am y troseddwr a'i dynnu oddi ar Restr Cleifion Cofrestredig y practis.
Mae trais yn y cyd-destun hwn yn cynnwys trais corfforol neu gam-drin geiriol gwirioneddol, neu'r bygythiad o drais corfforol neu gam-drin geiriol, sy'n arwain at ofn ynghylch diogelwch unigolyn. Yn y sefyllfa hon byddwn yn rhoi gwybod i'r claf yn ysgrifenedig ei fod wedi'i dynnu oddi ar y rhestr, ac yn cofnodi'r ffaith ei fod wedi'i dynnu oddi ar y rhestr yng nghofnodion meddygol y claf ynghyd â'r amgylchiadau a arweiniodd at hynny.
Byddwn yn rhoi gwybod i'r heddlu am unrhyw ymddygiad bygythiol neu drais gwirioneddol.